Saturday, March 23, 2013
Որ յաթոռ փառաց
Որ յաթոռ փառաց բազմեալ ընդ հօր անսկզբնակից բանդ. այսօր բազմիլ ընդ հողեղէնսն յանձն առեր. օրհնեմք զեկեալդ ի փրկութիւն աշխարհի:
Որ անճառ Աստուածութեամբդ օծեալ զքո ծառայական կերպ. այսօր հաճեցար օծանիլ իւղով ի մեղաւորաց. օրհ:
Որ կենարար թաղման քո գուշակ զիւղոյն ծանուցեր զօծումն. այսօր Յուդային յայտնեցաւ խորհուրդ արծաթսիրութեան. օրհ:
Որ խորհրդեամբ ընդ հօր եւ հոգւոյն արար ի պատկեր իւր զմարդն առաջին. այսօր որդիք մարդկան: ժողովեալ խորհին մատնել ի մահ զորդին Աստուծոյ:
Յուդա սիրոյն աշակերտ փոխանակեաց զատելութիւն առ վարդապետին. մատնելով քահանայիցն ընդ երեսուն արծաթոյ:
Վերաձգօղն երկնից մշտնջենաւոր հօր որդին. ներգործեալ իմովս ի վեր քան զհրաշս. ծառայի առեալ զկերպան կողոպտելի Աստուածութեամբն:
Բանին զմաքրեցելոցն ջրով զոտս լուանայր. զի զխոնարհութիւն ի նոսա տպաւորեսցէ. Երրորդութեանն գոլ օթեւան:
Բաշխէ զմարմին իւր եւ զարիւն նոր ուխտ անուանեալ. եւ յիշատակ կամաւոր մահուանն. մերձեցելոցս ի նա սրբութեամբ:
Արկողդ զլոյս որպէս զօթոց. այսօր անճառ խոնարհութեամբ ի վերնատունն խորհրդոյ. զգեստ ծառայի¬ սփածանիլ յանձն առեր. օրհնեմք զեկեալդ ի կամաւոր չարչարանս:
Որում երկրպագեն դասք հրեշտակաց. խոնարհեցար ի լուանալ զոտս հողեղէնս. բժշկել սոքօք զգարշապարս նախահօրն. բժշկեա զհոգւոյ իմոյ զհիւանդութիւն:
Որ ի խորհուրդս փրկականս եկեղեցւոյ բաշխեցեր աշակերտացն զմարմինդ քո. նորոգելով զմահացեալսն ի ճաշակմանէ. հաղորդս այսմ ընկալ զմեզ միայն մարդասէր:
Որ անսկիզբն յէութեանդես Աստուած. այսօր զգեցար զգեստ հողեղէն ծառայի ծածկելով զմերկութիւն նախահօրն. օրհնեալ եկեալդ ի փրկութիւն ազգի մարդկան:
Որ վերօրհնիս ի հրեղէն քերովբէից. այսօր եկիր կամաւ ի վերնատունն խորհրդոյ. լուացեր զաշակերտսն յօրինակ վասն մեր. օրհ:
Որ յաթոռ փառաց նստիս ընդ հօր այսօր բազմիլ ընդ աշակերտսն յանձն առեր. բաշխելով զմարմին եւ զարիւն քո սուրբ. օրհ:
Եկեալ ի փրկութիւն ազգի մարդկան. ի ծառայէ յանձն առնու մատնիլ ի դատաստան. համբերելով վասն զմեզ կեցուցանել:
Մատնեալ Պիղատոսի որպէս մահապարտ. ի յԱննայէ եւ ի Կայիափայ դատապարտեալ. համ:
Ավագ Չորեքշաթի օրվա Օրհնության շարականն է:
Subscribe to:
Post Comments (Atom)
No comments:
Post a Comment